20090618 今日細佬生日

-------------------------------------------------------------

我細佬係叻仔黎架！佢在4As廣告公司做ART DIRECTOR仔的，
之前仲o係廣告界CANNES拿了個獎。
我成日都同人講，係我細個果時同佢講過一句：
「你去讀BBA囉！去出賣自己靈魂囉！」
（事緣佢報JUPAS時同阿媽講話，要入大學讀BBA，大個搵錢。
我最怕人為左搵錢，唔理個社會同自己最需要乜野，
然後我o係佢隔離講左句咁有型，以為拍戲先有人咁講既說話。)

然後，有一日，
佢又出左成日街返黎，話POLYU DESIGN叫佢去INTERVIEW。

「你報左DESIGN咩？」
「係呀。」
「第幾志願？」
「放o左o係第一。」

果時到而家，我都認為佢係因為我而改變。
所以佢有咩成就我都當自己有份！
（不過可能原來真係唔關事……全部都係我自己諗。）

但我今日又突然醒起，佢果時好似係咁回應我：
「好似你咁呀？想入傳理系！想做DJ呀！」
「我入唔入到傳理系都可以做DJ。」
「係呀！你做到咪做囉！」（其實最後呢句真係唔太記得，唯有作句野收個尾。）

最後我入不到傳理系；最後我做到DJ。
不過我無覺得我細佬影響過我。

其實人與人之間，就係每時每刻互相影響。
我最開心，現在每天都透過自己節目《你睇我唔到》，
影響著更加多人。告訴人家：「唔係去出賣自己靈魂！」
「唔係入某一個系，先可以做某一份工，你要信自己得。」
……
點都好，細佬生日快樂，或者佢有份推我行到，
但我一直都唔知道。加油，無出賣靈魂，我引你為傲。
（上星期回屯門探阿媽，同阿媽食TEA時，
見到一班股票令到佢地死極，但又都係死唔到的師奶，
又在銀行門口睇住部電視，想嘔。有時間做D有意義D既事啦。）